28‏/05‏/2008




بذرتي الطاهره في أرضي الخبيثه

بذرة طيبه
أعلم ان احساسي نحوها ليس حبا حقيقيا ,
لكني أعلم ايضا انه بذرة حب طيبة طاهره
أرى هذه البذرة الطاهرة
حين أسعد لإبتسامتها
أرى هذه البذرة الطاهرة
حين أشعر بطيف حب يطرق قلبي
أرى هذه البذرة الطاهرة
حين أحس نهرا من السعادة يغمرني
أرى هذه البذرة الطاهره
ولكنى أيضاَ أرى أيضا هذه الأرض الخبيثه
فأنا أعلم أن ظروفى لن تسمح لى بالتقرب منها
وأن ظروفها لن تسمح لها بالارتباط بي
ظروف يصعب بل يستحيل معها الزواج
أرى مع هذه البذرة الطيبة
شجرة خبيثة تنبت
أرى هذه الشجرة الخبيثة
حين أسعى للقائها
أرى هذه الشجرة الخبيثة
حين لا أزيح صورتها من ذهنى
أرى هذه الشجرة الخبثة
حين اظل احتفظ برقمها
أرى هذه الشجرة الخبيثة
حين لا أخفى سعادتى لرؤيتها
أرى هذه البذرة الطيبة وتلك الشجرة الخبثة
أرى الصورة كاملة
أرها وأقرربكامل عزمي
أن اقتلاع البذرة الطيبه الطاهره من تلك الارض الخبيثة
هو الاصلح والاجدر
حتى لو كان هذا الاقتلاع سيقتلع معه امور جميلة في قلبي
حتى ولو كان هذا الاقتلاع سيترك جروحا في نفسي
حتى ولو كان هذا الاقتلاع سيفعل ما سيفعل
فسوف أقتلع البذره الطاهره
عسى أجد بذره أخرى في المستقبل
وإن كنت اشك في هذا



20‏/05‏/2008

لحظات في جنة الرحمن


جلسة اعتياديه

الوقت : الساعه 5بعد صلاة الفجر
المكان : تحت كوبري قصر النيل , اما النيل
الاشخاص : انا وحدي
كانت جلسة اعتياديه كنت ابحث فيها عن صفاء لقلبي اخذه من
صفحة النيل التى لم تستطع عيناي ان تلتقط صفاء مائها
كما لو تستطع نفسي ان تلمس صفاء قلبي ,
تشابكت الافكار في ذهني بين مستقبل بلا احلام حقيقيه وحاضر
بلا نقاط مضيئه وماضي احن الى ذكرياته الجميله وبرائته العطره


وفجأة ....
تغير كل هذا حين وقعت عيناي على هذا الطائر القادم من الفراغ
نحوى مباشرة كان بياض ريشه اشبه ببياض قلبي ايام طفولتى العذبه
وقف امامى على صفحة النيل , لا لم يكن النيل الذى اعرفه بل كان يقف
على نهر من انهار الجنه , تلفت طائر الجنة يمنيا ويساراَ حاملاَ
ابتسامة رقيقه على وجه المضيئ , لم يكن ينظر الى وحدي بل كان
ينظرالى أولئك المتقيين الجالسين على سرر متقابلين ,
وهم ينشدون أغاني الحب متذكرين أيامهم الخوالي في الدنيا
القى علي مسامعنا تغريدة السلام
محركاَ عيناه الجميلتان على صفحة هذا النهر العذب الصافي

ملتقطا بمنقاره سمكة من اسماكه المتراقصه ,
رفع بعدها رأسه عالياَ ربما حامدا خالقه ومبدعه
لم يكن يسعى ليغدي جسده بتلك السمكه بقدر ما احسست
انه يسعى ليغذى انفسنا إيمانا بإبداع خالقه سبحانه وتعالى
ثم نظر الينا نظرة وداع تختلط فيها مشاعر الفراق بمشاعر السلام
وطار عائدا الى فراغه الذى اتى منه


جلسه غير اعتياديه ....
عدت الى جلستى الاعتيادية التى اصبحت غير اعتياديه
وتلاشى كل شيئ بذهاب الطائر
تلاشى أولئك الابرار وتلك السرر
تلاشت تلك الأسماك المتراقصة في النهر
بل تلاشى النهر ذاته وحل مكانه النيل الذى اعرفه

تلاشى المشهد بأكمله
تلاشى قبل أمتع بصري برؤية الحبيب المصطفى
بين أولئك الجالسين على السرر

تلاشى قبل ان اشرب من ماء النهر العذب
ولولا ايماني بأن في الجنة
ما لا عين رأت
ولا أذن سمعت
ولا خطر على قلب بشر
لأقسمت انى رأيت الجنه


.............................


أردت ان اضع منظرا طبيعي قبل مقالى هذا لكنى لم اجد من المناظر
الطبيعيه برغم جمالها الخلاب ما يقترب ولو قليلا مما رأته عيناي


16‏/05‏/2008


حلمي أنا ... ونكبتي أنا ... وأملي أنا

حلمي أنا

كان حلمي ان يتحرر الأقصى... كان حلمي ان تزول اسرائيل

لم يكن حلمي ان يتحرر الأقصى بقدر ما كان حلمي ان اشارك أنا تحريره

لم يكن حلمي ان تسال دماء الشهداء على ارضه بقدر ما كان حلمي يسيل دمي أنا على ترابه العطر

لم يكن حلمي ان يصلي الملايين فيه بقدر ما كان حلمي ان اتشرف أنا بالسجود على ارضه

لم يكن حلمي ان يرفع الاذان فيه بالصوت البلالى بقدر ما كان حلمي ان تطرب اذني أنا بسماع الاذان فيه

لم يكن حلمى ان يبتسم أطفال فلسطين بقدر ما كان حلمي أن ارسم أنا البسمة على وجوههم

لم يكن حلم للامة كلها بقدر ما كان حلما شخصيا لي انا

نكبتي أنا

مات حلمي ,, مات واندثر ...مات وحلت مكانه نكبتى وهزيمتي

مات ولن اقاوم لاسترجعه

فما عدت املك القدرة على المقاومه

أملى أنا

رغم نكبتى وهزيمتي ... رغم موت حلمي ... لم يمت أملى

أملى ان يتحرر الأقصى ,,, أملى أن تزول اسرائيل

أملى ان يصلي فيه ملايين المسلمين

أملى ان يبتسم أطفال فلسطين



عن شعوري اكتب

عن شعوري اكتب
اكيد ان اي واحد مبيحبش ان الناس تتحكم فيه وفي قراراته
الاسوأ من كده ان الناس مش بس تتحكم في قراراته وافكاره
لأ انها تتحكم في مشاعره ساعتها بيتخنق
وغالبا مبيقباش تحكم الناس في مشاعره
اللى حصل معايا عكس كده رغم اني برضه مبحبش حد يعلق
على مشاعري
انس صاحبي ( لأ اعز صحابي) كلمني امبارح وقالى ان في جمله في تدوينه انا
كنت كتبتها مش عجباه , وقفلنا المكالمه على كده
ولما كلمته بليل لقيته لسه متضايق من الجمله
قلتله: لو مسحت الجمله يا انس هتكون مبسوط
قالي : ايوه
قلتله : لو مسحت المقال كله هتنبسط اكتير
قالى : ايوه
متتصوروش سعادتي لما حسيت اني هبسطه
رغم ان الموضوع بسيط وهايف
لكن فعلا احساس اني ببسط انس احساس جميل

14‏/05‏/2008

حين اصبح الحب لغيره


حين اصبح الحب لغيره

حب في كل الاحوال

بحب كل صحابي ,,, ببحبهم قوي ,,, بحبهم حب غريب

بكون فرحان قوى لما بخرج معاهم بالذات لو كان المكان حلو

ده حتى بعضهم بفرح لما بس يشوفه حتى لو مخرجتش معاه

واحيانا بفرح لما بسمع صوته حتى لو في التلفون

او لما بيان انه اون لاين على الماسنجر

بعضهم بيجي على بالى بمناسبه ومن غير مناسبه

وساعت لما بيجي على بالى بحس بسعاده وبفرحه غريبه

حب قديم

صحيح حبي لصحابي وفرحتى وانا معاهم ده مش جديد
ده من زمان من ساعت لما كنت في ३ اعدادي

بس زمان كنت بحبهم علشان ربنا

بحبهم في الله

بحبهم لانهم بيقربوني من ربنا

بحبهم لأني كنت بعمل طاعات معاهم
كنا بنصحي بعض الفجر , وبنصوم ونفطر الاثنين والخميس
وبنحفظ قران مع بعض , وبنصلي تراويح وقيام و.....
خوف من حب جديد

بس دلوقتى لأ انا مبحبهمش علشان ربنا

لانهم مش بيقربوني من ربنا ولا بنعمل طاعات مع بعض

ده حتى للاسف احيانا بنعمل معاصي مع بعض

بس برده والله مبحبهمش علشان مصلحه او خدمه

يعني حبي ليهم زي بالضبط حبي للى كنت بحبهم في الله

مفيش فرق غير موضوع الطاعات والمعاصي ده

زمان لما كنت بحب ناس في الله كنت بكون مطمن لما بخرج معاه

اننا مش هنعصي ربنا ,
دلوقتى بخاف لما بخرج معاهم لحسن نعصى ربنا

14‏/04‏/2008

انا وهؤلاء


أنا وهؤلاء

أنا ... أكيد انا محمد الأنصاري

هؤلاء... دول ناس حبتهم , أكيد مش الوحيدين اللى حبتهم ولا برده أول ناس حبتهم ولا حتى اكتر ناس حبتهم بس الناس دول من قبل لما اشوفهم كنت حبيت صفات معينه ولما قابلتهم لقيت الصفه ده باينه فيهم قوى علشان كده حبتهم من غير متعامل معاهم كتير ده يمكن متعاملتش معاهم أصلا

هذا البوكا احبه

مفتكرش انى ذاكرت علشان اتعلم غالبا كنت بذاكر علشان انجح , علشان مينفعش اسقط , علشان ارضي بابا وماما , بوكا ده مش كده ده بيذاكر علشان يتعلم صحيح انا اعلى منه في التقدير بس فعلا هوه اشطر منى في الهندسه , بوكا من الاشخاص القليلين اللى نفسي لما يخلصوا دراسه يسافروا برده لانى حاسس انهم عمرهم ما هيخدوا حقهم في البلد ده عموما بوكا مشترك السنه ده في مسابقة روبوكون ده مسابقه هندسيه لو كسب على مستوى مصر هيتاهل لمسابقه على مستوى العالم ادعوله ربنا يوفقه , بالمناسه كل لما اشوف بوكا بفتكر مثال المهندس المسلم زي ما كان الاخوه بيعلموهلنا اخلاق عباده محبوب متفوق دراسيا ...وكلام الكتب ده

د/محمود عزت

بحبه مش علشان هوه الأمين العام للأخوان واكيد برده مش علشان هوه دكتور تحاليل وعنده معمل

بحبه علشان بحس انه انسان رباني فعلا متتصوروش قد ايه بنبسط وان بشوفه بيختم الصلاه بعد الفجر

متتصوروش قد ايه بكون مبسوط وانا قاعد اتكلم معاه وحاسس بخوفه على الدعوه

متتصوروش قد ايه بكون مبسوط وانا حاسس انى بكلم واحد فاهم الدعوه صح والثوابت عنده واضحه وغير قابله للمساومه

احيانا بروح اتكلم معاه مش علشان عايز اعرف معلومه معينه لا علشان عايز احس فعلا ان الاخوان حاسين بالشباب

أروى الطويل

اخيرا عرفت انا ليه بنبسط لما شوف اروى بنبسط لانى بحبها , فعلا حبها زي لما بحب بوكا ود/محمود

من زمان وانا بحب ان ان البنت تقول رايها وتظهر - ومحدش يقولى اشمعنى البنت - ياسلام بقه لو كان رأيها ده اسلامي ويبقى تمام قوى لو كان اخواني كمان

هذه البرايد احبها

غاده عبد العال

مش عارف ايه اللى خلاني اشترى كتاب (عايزه اتجوز) هديه لأختى الى حصل اني اشتريته وبعديها حبتها

حبتها لأنها خلت اختى تقرا , حبتها لانها خلت اختى تضحك من قلبها

حبتها لانها خلتني اضحك من قلبي صحيح حطتني في شوية مواقف مش حلوه لأني كنت احيانا بقرا الكتاب في المواصلات وافضل اضحك طبعا كل اللى حوليها كانوا بيبصولى على اني مجنون بس مش مهم المهم انى ضحك من قلبي

ونصحيه اشتروا الكتاب فعلا كتاب حلو ده

وهفضل احبهم

اكيد الناس دول فيها عيوب

اكيد ان بوكا احيانا بيكون حاد في تعامله مع الناس واحيانا بيفكس

اكيد ان د/محمود احيانا مبيقنعنيش كلامه

اكيد ان أروى الطويل .... مش عارف بس اكيد فيها عيوب, كفايه اني مش عارف ادخل على مدونتها

أكيد ان غادة عبد العال مش علطول بتضحكني ده فعلا الحلقه بتاعت شبابيك معجبتنيش قوي

بس كل ده مش مهم المهم اني لقيت الصفات اللى انا بحبها في الناس دول فحبتهم ويارب تفضل فيهم الصفات ده وافضل احبهم





08‏/04‏/2008

عيد ميلاد لولو




عيد ميلاد لولو
في مثل هذا اليوم
امبارح وانا بقرا على عشرينات
استغربت موت لما لقيتهم كاتبين ان اضراب 6 ابريل اتحط في ويكيبيديا ضمن اهم 10 احداث في مثل هذا اليوم اللى خلاني استغرب بجد مش انهم حطوا الاضراب لا انهم محطوش ضمن اهم الاحداث عيد ميلاد اخويا وحبيبي بلال
يوم 6 ابريل 2008 بيقى كمل 15سنة بالتمام والكمال وكل سنة وانت طيب

بلال والاضراب
بلال كان اكتر واحد في البيت متحمس للاضراب وعجباه فكرة ( خليك بالبيت ) مهو طبعا مش هيروح المدرسه
واليوم اللى قبل الاضراب نزل يشتريلنا حاجات الفطار والغدا والعشاء بتاعت يوم الاضراب
يوم الاضراب الصبح طبعا مارحش المدرسه اذا كان في الايام العاديه مبيروحش فما بالكو لو كان واجب وطني
وطبعا مفيش دروس يعني بيوظ الاضراب ويساعد الحكومه ميصحش برضه ,
الجميل فعلا ان اليوم ده كان عيد ميلاده , وبلال مرضاش يحتفل بيه وقرر يأجله لليوم اللى بعده

بلال العصامي
بجد ده احلى حاجه في بلال انه عصامي - طبعا مين يشهد للعروسه - بيفكرني برجال الاعمال اللى بدؤ من الصفر حتى هوه بيحب الحاج محمد العربي بتاع توشيبا
بلال من كذا سنه وهوه بيحب يعمل مشاريع تكسبه فلوسه في الاول حوش من مصروف واشترى عدة الشغل بتاعت الجزمجي وبقى يمسحلنا الجزم الجزمه بربع جنيه وفي ساعات الذروة بنص جنيه
وبعدين بدا يشتري حلويات بالجمله ويبعلنها في البيت قطاعي شوية وقلب على حوار كروت الموبايلات وبقى يلف على المحلات بيعلها بعديها خد دورة في صيانة الموبايلات المهم ان اى حاجه تجيب فلوس ممكن يشتغل فيها

كابتن مصر ... بلال
بلال بيكره المذاكره موت مش عارف ليه ده حتى مره ماما سألته نفسك تدخل كلية ايه ؟ قال يعني تخلي عنده حلم وامل وكلام من ده راح بلال رادد عليها وقالها ادخل كليه طب خاص معرفش ايه الواد اللى حلمه انه يفشل ويدخل خاص
وطبعا بلال مبيحبش القراءه بس انا من حوالى اسبوع جبتله كتاب ( كابتن مصر ) بتاع عمر طاهر الكتاب عجبه قوى وقراه كله والنهارده هوه اشترى كتاب تاني ( كتاب : شكلها باظت ) برضه بتاع عمر طاهروقالى انه ممكن بيقى يشتري بعديها كتاب قلمين بتاع بلال فضل اصله كان شافه مره في التلفزيون وعجبه متتصوروش قد ايه انا فرحان بموضوع القراءه ده

بلال ووسط البلد
بلال اكتر واحد في البيت بيحب المزيكا والكلام الفاضي ده حتى هوه الوحيد اللى في البيت عندنا بيسمع اغاني بقيت البيت بيسمع اناشيد بيت اخوانى بقه
بلال من محبين فريق وسط البلد وفريق بلاك تيما ده

يوسف اخو بلال
يوسف اخو بلال وطبعا اخويا انا كمان , هوه من باب العدل والمساواه لازم اتكلم عن يوسف برضه بس الحقيقه انا مبحسش انه اخويا ده الفرق بيني وبينه 21 سنه كتير قوى يا جدعان انا بحس اننا ابوه مش اخوه
المهم انا مش هتكلم عن يوسف دلوقتى كتير في عيد ميلاده انشاء الله هبقى اتكلم عن طبعا مش محتاج افكر الناس فى ويكيبيديا وفي عشرينات انهم يحطه ميلاد يوسف برضه من اهم الحاجات في مثل هذا اليوم بالمناسبه يوسف مولود 6 اكتوبر ومش لازم يحط قبل حرب 73 ممكن بعديها الحرب برضه كانت مهمه

بقية العيليه
مش هينفه احكي عن بقية العيله احنا سبعه ده غير بابا وماما - قولو ما شاء الله - ابقى احكلكو عنهم بعدين
بالمناسه موضوع عددنا الكبير ده مره حطينا في موقف مش ولا بد ساعت لما الناس بتوع التعداد السكاني كانو بيلفوا على البيوت الراجل جالنا ومعاه عم على البواب الراجل سالنى كام سؤال وبعدين قالى ممكن تقولى اسامي الناس اللى سكانين في البيت انا بتلقائيه قلته : حسن الانصاري , محمد حسن الانصاري , بلال حسن الانصاري , أسماء حسن الانصاري , ايات حسن الانصاري ,
اكرام حسن الانصاري ,.... ولسه هكلمه راح قالى لا لو سمحت اللى انا عايز اسامي اللى ساكنين بس مش كل قرايبكوا , طبعا عم على مقدرش يمسك نفسه وقعد يضحك على ايه مش عارف ايه المسكله يعني اننا نبقى كتير






04‏/04‏/2008

انا ونفسي والشيزوفرينيا



انا ونفسي والشيزوفرينيا


شيزوفرينيا الحفلات

من يومين كنت في حفلة بلاك تيما في الساقيه وحصلت شوية مواقف حسستني انى عندى شيزوفرنيا
- ليه مع ان كان فيه بنات بيرقوصوا في الحفله ممشتش من الحفله وعديت الموضوع وبس لما بنت عمى رقصت في خطوبة اختها كان هاين عليا اقوم اديها علقه واسبي الخطوبه وامشي
- ليه لما شفت بنات لابسين عبايات في الحفله قعد اقول لنفسي ودول جايني يعملو ايه ما كانوا يسمعوا الاغاني في بيتهم ومقلتش كده على البنات التانين او حتى على الولاد
- ليه لما ولد ولع سيجاره رحت وطلب من يطفيها ومقلتلوش حاجه على لازقته في البنت اللى قدامه كانهم متجوزين وفاكرين نفسهم في شقتهم لوحدهم


نفسي قالتلى : انت مريض يا والد يا محمد ولازم تتعالج ,

رحت انا قايل لنفسي: يمكن بس ده مره كده وخلاص انت ولا مريض ولا حاجه ما انته علطول عايش زي الفل ,,,
راحت نفس قيلالي: لا يا محمد ده مش اول مره فاكر حفلة مصطفى محمود بتاعت المولد النبوي وعيد الام


- ليه لما شفت بنات مسحيين حاضرين الحفله قعد تقول لنفسك ودول ايه اللى جابهم هنا مع انك طول حياتك واجد دماغ الناس بان المسحين مظلومين واننا مينفعش نضطهدهم واننا لازم نعاملهم زيهم زي المسلمين
- ليه لما فيه منتقبات قعدوا يصقفوا ويصفروا في الحفله قعد تقول ايه الهبل اللى بيعملوه ده ومع ان انا نفسي كنت بصقف واصفر


ورجعت نفسي تقولى : شفت بقه ده مش اول مره انت لازم تتعالج

, رحت انا قايلها :لا يا حبيبتى يمكن موضوع الشيزوفرينا ده مع الحفلات وبس حاله مؤقت يعني وهتعدي

شيزوفرينيا البنات

راحت نفسي قيلالى:
- ليه لما المواصلات بتكون زحمه وتطلع بنت لابسه محترم بعمل فيها انى شهم وبقوم واخليها تقعد مكاني ولو طلعت بنت لابس مش ولا بد ولا بتسال فيها وبتسبها واقفه
- ليه لما بكون هركب الاسانسير وفيه بنت لابس محترم بسبها تركب ومبرضاش اركب معاها ولما تكون لابسه مش ولا بد بركب عادي معاها
نفسي قالتلى: شفت انك عندك شيزوفرينا روح يالا اتعالج

قلتها: لا ثواني يمكن موضوع الشيزوفرينا ده مع البنات بس يعني ممكن اعتبرها مراهقه متاخره

شيزوفرينيا ام نفاق
راحت نفسي رجعت ترخم عليا تاني وتقولى :
- ليه يتفضل تقول انك بتحب ربنا ومع كده مبتصحاش الفجر ده حتى فيه ايام مبتزعلش ان الفجر ضاع عليك
- ليه بتفضل تقول انك بتحب ماما ومع كده اول لما تقولى اقعد ذاكر بتخنق واحيانا برد عليها بشكل مش كويس
-ليه بتقول انك بتشتغل علشان ربنا ولما الاخوه يطلبوا منى شغل مش على مزاجى مبعملهوش وبعتذر عنه ولو الشغل كان على مزاجي بكون متحمس جدا
قلت لنفسي خلاص خلاص انا صدقتى انا عندي شيزوفرنيا واروح اتعالج
راحت نفسي قيلالى : ثوانى كده انت شكلك معدكش شيزوفرنيا انت شكلك عندك نفاق

نعم... اه نفاق, مش النفاق بتقول حاجات غير اللى انت بتعملها
سعتها اترعب لو شيزوفرينا كان امرها سهل ديتها دكتور نفساني بس دلوقتى اعمل ايه في موضوع النفاق ده

14‏/03‏/2008

الكوربه ... ذكريات الكوربه

ذكريات الكوربه

اول خروه

اول لما جيت مصر كنت في تالته اعداي كان جدو على طول بيخرجني انا واحمد الجمال ابن خالى كانت خروجه محفوظه ومكرره لكني كنت بحبها كنا بنصلى المغرب جنب البيت في جامع الخلفاء وبعديها نتمشي في شارع الحجاز لحد روكسي ونعدي على ابو حيدر نشرب عنده مانجه وبعديها الكروبه ونوصل عند شارع هارون على اذان العشاء نصلى في ميدان الجامع ونروح

حبيت الخروجه قوى عشان حاجات كتير كفايه ان جدو واحمد معايا وكمان وكفايه كمان بنات روكسي اللى الواحد كان بيخبط فيهم من الزحمه وهو مش واخد باله

عموما خلاص مبقتش اخرج الخروجه ده بس اللى لسه لحد دلوقتى بعمله اني بروح الكوربه كتيير تقريبا كل حته فيها ليا فيها ذكريات جميله

شبراوي الكوربه ... بعد لما نخلص لقاء الاسره نروح نتعشى فيه ولا قعدته في سحور رمضان وطبق الفول االسكندراي ملهوش حل

سيلنترو... لو مفيش اسره والواحد معاه شويه فلوس ومش لاقي مكان اقعد فيه انا وانس وفيجو بيقى الحل سيلنترو

ستاربكس ... ولاد اللذينه واخدين مكان مش طبيعي حلو قوي بليل لكنى بطلت اقعد عليه علشان فيجو بقولى انه مقاطعه, لو حد مش مقاطع انصحه يروح يقع عليه

سونستا... انا عندي عقد انى بحب الجلي موت وماما مبتعملهوليش بيقى ايه الحل , اكيد سونستا هيه الحل

تبارك بتاع الجمبري... انا مبحبش السمك او اي حاجه تقربله بس لو ليك فيه بيقى لازم تجرب تبارك

عمو حسني ... ده لسه فاتح في الكوربه من فتره قريبه بس بتاع الكوربه مش حلو قوى خليك في بتاع الاسماعيليه

سينما نورماندي ... لما اكون علاقتى مش قد كده باخويا بلال ممكن اروح معاه فيلم طبعا باختار الافلام

بينوس ... هما الخدمه عندهم مش حلوه بس المكان واسع وجميل دايما بيكون في اعياد ميلاد بس اجمل عيد ميلاد شفته كان بتاع بنت وواضح انها هيه واصحبتها كلهم من نوعية اللى مابيقتنعوش بان الجيب والحاجات ده حاجاب زي اروى الطويل كده لازم عبايه المهم ان كان شكلهم جديد

كوربه الاخوان ... من الحاجات اللى مينفعش انساها مظاهره للاخوان ساعت انتخابات مجلس الشعب في الكوربه يوميها كنت فرحان موت

قهوه الكوربه ...قعدتها لذيذ بليل بس اللى بينافسها في القعد قهوة البسفور في شارع هارون طبعا مبشربش شيشه والاحس ان الواحد مايقعدش على قهاوي احسن

مكتبة الشروق ... لو ليك في شرا الكتب اكيد هتبنسط اصل انا مليش كفايه عليا انى استلف من صحابي الكتب

بتاع الجرايد... لو تحب تقريف على نفسك وتقرا جرايد المصري اليوم والدستور وكلام المعارضه ده هتلاقى الراجل بيقعد من الساعه حداشر بليل لحد ثلاثه اربعه الفجر

الحلو مايمكلش

الكوربه ده ناقصه تلات اربع حاجات وتبقى احلى مكان في مصربالنسبالى

اولا ناقصها الجناين والخضرة ياريت يقفلو الشارع ويخلوه جناين ومفهوش عربيات

ثانيا ناقصها جامع زي جامع محمد على بتاع القلعه انا بحب الجامع ده قوي هيه في كنيسه قدام الحريه مول شكلها جميل بس لو كانت جامع كا نت هيبقى احسن

ثالثا فيه محل صغير كده بتاع خمره ياريت يتشا كل لما اعدي جنبه اتخنق

رابعا ناقصها شخصيه زي كده تسكن فيها اكيد هتضفلها كتير

لو بقى بنقلوا النيل جنبها بيقى بجد خدموني خدمة العمر

21‏/08‏/2007

ظلم قريبي لصاحبي



 
 ظلم قريبي لصديقي

صحابي هما حياتي , ده تقريبا اقرب وصف لحياتي
طول حياتي وانا مقدرش استغنى عن صحابي من ساعة لما
كنت عايش في السعودية كنت بقضي معظم وقتى مع صحابي
ولما جيت مصر في 3اعدادي وماكنليش صحاب في مصر
كانت الحياة بالنسبالى سوده كنت فعلا كاره البلد ده لحد لما
اتعرفت على ( وليد سعيد)

وليد وأنا
وليد كان بيدرس الاشبال في الجامع اللى
جنبينا اللى والدى اصر انى احضر النشاط فيه رغم انى مكنتش عايز
احضر ,في الاول كنت بحضر علشان وليد وكنت بحب قوى لما يقسمونا
اني اكون في مجموعته رغم ان وليد كان اكبر منى بحوالى 7سنين
إلا اني كنت بعتبره اقرب صحابي
كنت بقضي معاه معظم اجازتي من ساعة لما اصحي اروح عنده البيت
وبعديها ننزل النشاط من العصر لحد العشاء وبعديها ارجع
اقعد معاه او نخرج او نعمل اى حاجة المهم كنا بنفضل مع بعض
اتعرفت على بباه ومامته واخواته وهو كمان اتعرف على اهلى
كنت بقضي كل حياتي معاه , واحيانا يكون عنده لقاءات ومواعيد
وكنت احضرها معاه ولو لقاء كبير مينفعش احضر كنت بستناه
لما يخلصوبعديها نخرج مع بعض

وليد والاخوان
هوه اول واحد عرفني يعني ايه اخوان وبيعملوا ايه وعايزين ايه
كان يكفيني ان وليد شايفهم ناس كويسين علشان احبهم
واول لما قعد لقاء تربوي كان هوه مسئولى وفضل مسئولى التربوي
اكتر من 3سنين ورا بعض ( اظن انها عمرها ما حصلت
لحد في الاخوان)وبعديها فضل مسئولى في حاجات ادارية
اتعلمت منه كتير واتاثرت بيه قوي من غير مااخد بالى
كنت بعتبره واحد من الناس القليلين اللى بيحسوا بيا

وليد وأسماء
علاقتى بيه ما يبنفش تتوصف لدرجة انه لما عاز يتقدم لاختى
وكان في نفس الوقت فيه اتنين تانين متقدمنلها وقفت في صفه طبعا
واقنعت اهلى يوافقوا عليه
ويوم خطوبة وليد واسماء كانت فرحان بشكل مش طبيعي ,
كنت بنزل اشترى معاه الهدايا لاختى في بداية فترة الخطوبة 
كنت حاسس ان علاقتى بوليد هتزيد بدل لما هيه علاقة صحاب
هتبقى علاقة صحاب وقرايب كمان لكن للاسف حصل عكس كده
بدات علاقتى بوليد تقل وبدل لما علاقة الصداقة تزيد بالقرابة
لقيت ان علاقة القرابة بتقلل من الصداقة بشكل كبير
لدرجة اني بقيت احيانا بتخنق لما وليد يجي يزورنا في البيت
مش عارف ليه ؟ يمكن لاني كنت بضطر اقعد في البيت لاني الاخ
الكبيروبابا مسافر, يمكن كنت بتخنق لاني كنت بغيير ان اختى
شغلة معظم وقت وليد مش عارف المهم ان ده كان احساسي

وليد وأنس
تقريبا علاقة الصداقة اللى بيني وبينه انتهت انا فعلا حزين عليها
 وان كانت علاقةالقرابة اتحسنت كتير بعد لما وليد واسماء اتجوزوا
وبقيت اروح ازورهم في بيتهم
كل الذكريات ده افتكرتها الاسبوع ده بعد لما ربنا رزق وليد واسماء
باول مولود (انس) 
فرحت قوي بانس خاصة انه على اسم اعز صحابي
فرحت قوي لاسماء اختى ولوليد قريبي بس اكيد
انى كنت هفرح لوليد صاحبي اكتر بكتير من فرحتى ده

وليد ووليد
احيانا
بحس ان وليد قريبي تعدى على حقوق وليد صاحبي
بحس ان وليد قريبي خلاني اظلم وليد صاحبي
بحس ان وليد قريبي خلاني اقتل جوايا وليد صاحبي
يمكن الاحساس ده اللى بيزعلني من وليد قريبي احيانا
صحيح انا دلوقتى علاقتى كويسه بوليد قريبي
بس كان نفسى احافظ على وليد صاحبي اللى كان بيحس بيا



16‏/08‏/2007

اول مرة تحب يا قلبي



أ
ول مرة تحب يا قلبي




مع انه اول حب في حياتي
لكنه عادي زي اللى بيحكوا عليه في الافلام

هي زملتي في الدراسة , في الاول كانت زيها زي اي واحدة
لكن بعد فترة ( مش عارف ايه السبب ) كنت بحس انى بستريح
لما بشوفها ( كنت بحاول اغط بصري)وبدات الراحة تزيد لكن
السنة كانت خلصت وبدات الاجازة وفضلة فاكرها طول الاجازه
ولما طلعت النتيجه بصيت على نتيجتها بعد نتيجتى علطول
ومع بداية السنة الجديدة الموضوع زاد هيه دخلت كهربا وانا
دخلت ميكانيكا كنت بروح القسم عندها كتير وهيه بدات تاخد بالها
كنت بتعمد اركب معاها احيانا - احنا في العاشر والطريق بياخد
ساعة - كانت ساعدتي في الساعة ده ماتتوصفش
محاولتش اكلمها بشكل مباشر مع ان جت اكتر من فرصت
مكنتش محتاج اكلمها الكلام كان باين في عيني


قررت اتجوز
وفجاة خد القرار اني اتقدملها وبدات اسال عنها وبعدين
كلمت اهلى واقنعتهم طبعا بعد نقاش طويل
اتصلت بابوها وفاتحته في الموضوع لكن كان رده واضح
- انتوا لسه طلبه اجل الموضوع لما تتخرجوا -م
حتى انه رفض الخطوبة او مجرد مقابلتى
مع اني طبعا زعلت لكن ده مغيرش في مشاعري تجاهها
اتعرفت على اخوها وكنت بتصل بيه كل فترة لما كانت بترد عليا
كنت يدوب بسلم عليها واحيانا بسألها عن اخبار مذاكرتها
لكن ماحولتش ازود مع ان كان فيه اكتر من فرصة مناسبة
خاصة ان كان فيه اكتر من مادة مشتركة كنا بناخدها مع بعض


اعجاب مش حب
وبعد فترة اكتشفت حاجة غريبه انى معرفش حاجه عنها
عن صفاتها واذا كانت تناسبني ولا لأ
اكيد احساسي تجاها مش حب مجرد اعجاب
لان مش معقوله واحد يحب واحده من غير ما يعرف عنها حاجه
يمكن اعجبت بشكلها ؟ لا شكلها مش جميل بشكل وهمي بالعكس
هيه عادية
طيب يا ترى ليه بحبها؟ اتصدمت لما عرفت السبب
انا بحبها لانها بنت مصرية -مش قصدي طبعا على صاحبة
مدونة بنت مصرية لاني معرفهاش اصلا -


بحب البنت المصرية
انا بحب فيها لونها بشرتها القمحي
بحب فيها حياء وكسوف البنت
وحيوية ونشاط الشابة
بحب وقفتها مع شلة صحابتها البنات
بحب خجلها لما يجي شاب يكلمها
بحب فيها تدينها الفطري وحجابها الجميل
بحب فيها حبها لاي نشاط خيري  يتعمل في الكلية
بحب فيها ضحكتها البسيطة
بحب فيها البنت المصرية


حب من بنات افكاري
انا فعلا كنت بحب واحد في خيالي واحد فيها كل مواصفات
البنت المصرية
ولان زملتي ده كانت اول واحده اتعامل معاها لاني قضيت معظم
وقتى السعودية فاول لما لقيتها زي ما تقولو كده
حطيت الصورة اللى في خيالي على الشكل الواقعي اللى قدامي
انا فعلا بحب البنت المصرية
مش عارف الله اعلم ممكن تجوز زملتي ده قدام وممكن لأ
الجواز قسمه ونصيب صحيح انا دلوقتى مش مرتبط بيها نفسيا
لكنى متاكد انى اول حب في حياتي هوه اجمل حب
لانه حب للبنت المصرية


08‏/08‏/2007

فراق الحبيب



فـــراق  الحـبـيـــــب




بجد حاجة صعبه قوي انك تفارق انسان بتحبه
حاجه كده مبنفعش تتوصف
الاسبوع اللى فات ده لوحده
حسيت بمرارته 3 مرات وره بعض
اول مرة لما فيجو سافر للعمرة
وبعديها بيومين انس سافر المانيا
وامبارح لؤي سافر سوريا



بداية الحب
بوصوا انا اول لما احب واحد بحس انى
نفسي افضل معاه علطول بكلمه كتير قوي
لدرجة انه ممكن يزهق ويتخنق
اول لما حبيت احمد مجدي كان بالميت
بفضل معاه اكتر من 12ساعة في اليوم
ده غير اني اول لما اسيبه وارجع البيت اتصل بيه
ممكن المكالمة توصل لاكتر من ساعة
في حاجة تانيه بتحصلي اول لما احب اي حد
اني بحب اجيب سرته في اي حوار
حتى لو ملهوش علاقه بيه
بجد بيقبى حبيبي ده محور حياتي
تدريجيا تبدا المظاهر والمشاعرالجميله
ده تقل شويشية شوية يمكن يمر اسبوع او اسبوعين
من غير ولا حتى مكالمة



شكل جديد للحب
كنت زمان بفتكر ان كده خلاص
وانى مبقيتش احبه ولا حاجة
بس طلعت غلطان ولقيت حبي ليه
بيتحول من مجرد شوية مظاهر
لحب بجد
او تقدر تقول ان شكل الحب بيتغير
يمكن افضل اسبوع ماكلموش بس
 اول لما مجرد اسمعه انه محتاج حد جنبه
بجري عليه علطول
وانا كمان اول لما احس ان محتاج اشكي لحد
علطول بتصل بيه
واول لما احس انى ممكن افتقد علشان هيسافر
بتبقى حالتى وحشه قوى
فعلا بحس بمراة
مبحسش بطعم اي حاجة
بكون خنيق قوى
بصوا انا ممكن اختار اني ابعد شوية عن اللى بحبه
بس مقدرش استحمل ان الظروف هيه اللى
تفرقنا
عموما ده سنة الحياة
تقابل
الناس وتحبهم وبعدين
تفارقهم

29‏/07‏/2007

احسن ناس



اظن ان معظمكوا سمع عن خدمة موبينيل
الجديدة ( احسن ناس )بمناسبة احسن ناس
 كنت بحب الاغنية ده جدا لحد لما واحد صاحبي
 قاليه انها بتستفزه ولما شرحلي السبب اقتنعت وبقيت اتخنق منها فعلا
ابقى احكيلكو مشكلة الاغنية بعدين
نرجع بقى للخدمة انا اصلا فودافون
فطبعا مش هينفع استخدم الخدمة ده لكنى
سالت نفسي لو من حقي اختار 3 اشخاص
ينفع اكلمهم بنص سعر المكالة
يا ترى اختار مين
ان جيت للحق انا مطولتش في التفكير التلاتة هما

أنس صاحبي وحبيبي والسبب انه راجل
يعني لو اتصلت بيه في اى وقت وطلبت منه
اي خدمة هيعمل كل اللى يقدر عليه
علشان يساعدني

الشخص التاني هوه فيجو وده بقى مش
علشان الخدمات لا ده علشان
هوه حضن كبير قوي بحب قعد اتكلم معاه
برتاح علطول وانا للاسف من الاشخاص
اللى ممكن يتخنق من موقف صغير ويفضل
مخنوق لكن لما قعد اتكلم مع فيجو
بفك علطول وارجع لطبعتي

الشخص التالت هوه احمد مجدي
ومفيش سبب واضح علشان اختاره
لكني بحس فعلا انه انسان رباني
كمان مخه نضيف صحيح
في اغلب الاراء بنختلف
بس بيعجبني تفكيره

هما التلة اشخاص دول مش سوبر مان
ولا الشباب اللى محصلوش
واكيد فيه احسن منهم
بس بالنسبالى ميتعوضوش
ولو حد منهم حصلوه حاجة تزعله لا قدر الله
مهما كانت صغيره بزعل جدا وبحاول فعلا اساعدني
ولو حاجة حلوه حصلت لحد منهم
بفرح كانها حصلتلى ويمكن اكتر كمان

اللى زعلني فعلا ان التلاتة اشخاص 
اللى انا اخترتهم مفهومش والدتى ولا والدي
مع انى والله العظيم بحبهم
ولا فيهم حد من الكبار اللى احيانا 
الواحد بيكون مزنوق ومحتاج لنصيحتهم

عموما ان بفكر اطلب من فودافون انها تعمل الخدمة ده
بس عدد الاشخاص يكون اكتر شوية
 

28‏/07‏/2007

خبر من اخوان اون لاين

قال النائب ( حمدي حسن) في سؤالٍ قدَّمه لوزير الداخلية إن
هناك معوماتٍ تؤكد أن أحد الطلاب الثلاثي المخطوفين
قد تُوفي نتيجة التعذيب الشديد الواقع عليهم
في أحد سلخانات الشرطة المصرية، وترددت
هذه المعلومة أثناء احتجاج أهاليهم أمام مكتب المحامي العام
بالإسكندرية، وأنه بالرغم من التقدم ببلاغٍ رسمي
إلى النائب العام منذ أسبوعٍ تقريبًا إلا أن أحدًا لم يتحرك
ولم تكشف الشرطة وهي التي اختطفتهم عن أماكن احتجاز هؤلاء
حتى اليوم أو كيف تصرفت معهم في سابقةٍ خطيرة تنم عن سبق إصرار
لعدم احترام قانون أو دستور أو أنها تنتظر أن تختفي علامات
التعذيب وشواهده كي لا يتم إثبات ذلك عن طريق الطب الشرعي.

27‏/07‏/2007

مش قلتلكوا محدش حاسس بيا



يمكن اول امبارح كان كله حاجات تفرح بس للاسف امبارح
ما كنش كده اول لما صيحت من النوم صحيت على خبر
ان والدة احمد مجدي (واحد من اعز اصحابى ) في المستشفى
من يومين ادعولها ربنا يشفييها رحت
زرتها بعد صلاة الجمعة ورجعت
كان عندنا في العيلة النهارده شبكة (عقبالكو كلكو )
ودخلت البس لبست قميص 
وبنطلون جينز والدي زعل وقالى البس بدله 
 ده مناسبة عائلية مش خروجة مع
صحابك للاسف مسمعتش كلامه
واصريت على لبسي طبعا زعل مني شوية
المهم نزت مع اهلى علشان نروح
لقيت كاوتش العربية نايم قلت حصل خير  طلعت الاستبن
وجيت اركبه طله هوه راخ نايم المهم
قلت لوادي ناخد تاكسي وبعدين نشوف
الموضوع ده في الاول وافق
وقبل لما نمشي راح عمي قال
نصلحا احسنا طبعا خد الكوتش
وواديته لمحل في اخر الشارع
المهم ليلة طويلة كده في الاخر هدومي اتبهدلت
طلعت اغير ورحنا الفرح اول لما دخلت
لقيتهم مشغلين سعد الصغير وبنات عمي قعدين
يرقصوا مع الولاد والمشكلة انهم ما بيعرفوش يرقصوا
 يعني ذنوب وخلاص 
وانا قاعد مخنوق في الفرح
اتعرفت على راجل قد والدي
واضح انه كان مخنوق من ولاده قعد ينقد في جيلنا
وان احنا شباب مستهتر وكلام كتير من ده
المهم خلص الفرح وجاي اروح مع
والدي بالعربية اللى انا صلحتها
لقيته بيقولى مالكش مكان علشان
هوه عايز يوصل ناس قريبنا
طبعا اضريت ارجع موصلات
المهم رجعت البيت وكنت مخنوق
اخر حاجة قلت ادخل على النت افك شوية
تقريبا مفيش دقايق وقريت خبر
على مدونة ( انا اخوان )
عن تكهن بوفاة احد طلاب الاخوان من الاسكندرية
من اثار التعذيب في مقر امن الدولة
طبعا زعلت عليه قوى بس اللى بجد زعلني واثر فيه
خوفي على انس اللى لسه واخد افراج
واكيد هيترحل على امن الدولة الاول
انا مخنوق ومتضايق بجد
حاسس ان محدش حاسس بيا

26‏/07‏/2007

فيجو محمد فيجو نجح يا رجالة




فيجو ده واحد من اعز اصحابي من شوية بس لسه معدي عليا
وقالى انه نجح وجاب جيد جدا
( فيجوا في بكالوريوس كهرباء جامعة عين شمس 
اول لما قالي كده فرحت اوى وحضنته حضن جامد بقالى كتير ما فرحتش
زي النهارده في يوم واحد اسمع خبرين كويسين لاتنين من
اعز اصحابي انا جالي احساسين في نفس الوقت
الاول : افتكرت كلمة واحد من الصحابة اظنه ابو بكر الصديق
لما قال ( فشرب الرسول حتى ارتويت )
انا فعلا حسيت النهارده كده لما عرفت ان فيجو نجح
زي بالضبط  ما اكون انا اللى نجحت
الاحساس التاني : ان ربنا انعم علينا النهارده بالنعمه ده وانها رسالة لاني
للاسف بقالى فترة مش كويس في علاقتى مع ربنا عموما
الحمد لله ان لسه انا بحس بصحابي بحس بفرحهم وبحزنهم
وهما كمان لسه بيحسوا بيا
والحمد لله ان ربنا لسه بيخلينه احس برسايله ليا

الحمد لله .. خرج انس ..واحد من اللى بيحسوا بيا



انا لسه عارف حالا ان مجموعة من شباب عين شمس اللى كان مقبوض عليهم 
خدوا افراج ما تتصوروش فرحتي قد ايه
عموما انا  هتكلم عن واحد بس دلوقتى من الشباب دول هكلمكوا عن انس عبد القادر
 انا اعرف انس من حوالى 7 سنين 
من اول لما اتعرفنا على الاخوة (قصدي الاخوان المسلمين )وبداوا يقولولنا اننا لازم نشتغل
 وندعوا في المدرسة كنا في اولى ثانوي
 وكلام كتير من الكتير منكوا عارفوه بجد كانت من احلى ايام ومع بداية الصيف رحنا مسجد جنبنا 
وبداوا يقولولنا هاتوا صحابكو
وبدا يعلمونا ازاي ننظم مقراة ورحلة وشوية شوية نشاط كامل وازاى نشتغل دعوة فردية 
مع صحابنا رغم ان ساعتها ماكنش
عندنا النضوج الفكري اللى يخلينا نستوعب كل اللى بنعمله لكن فعلا كنا بنكون 
فرحانين جدا يوم ما كنا نعمل يوم رياضي
ويجي عدد كبير ومرت 7 سنين يمكن يكون استعبنا من الناحية الفكرية لدعوة الاخوان زاد
 بس انا عن نفسي فقد الحماس بتاع 
ايام ثانوي لدرجة اننا الصيف ده ما بشتغلش في اى حته ده طبعا كان ماثر على نفسيتي قوى
 وكان مضايقني لكن للاسف
مكنش حد حاسس بيا حتى الاخوة ياما احتايلت عليهم يشغلوني في حتة وكل مرة ملاقيش رد 
واضح في المقابل انس كل سنة كان 
حماسه بيزيد وده من الحاجات اللى كانت بتاثر فيا احنا بدانا مع بعض  هوه استمر 
وكمل وانا كل شوية ابعد اكتر
عموما اديه طلع من السجن الحمد لله اول لما اقابله ويحكيلى اللى حصله اكيد هقولكوا 
عليهودولقتى اسبكوا علشان
 والدتي بتجهز الغدا
  

25‏/07‏/2007

أول تدوينة ..حلاوة التجربة الاولى


الساعة دلوقتى الرابعة فجرا يعني باقى ربع ساعة والفجر ياذن وانا غالبا متعود ارغي والت واعجن في نفس الموضوع بس
المرة ده مش هعمل كده علشان بفكر اقوم اصلى ركعتين علشان كده هتكلم في نقطتين بس
الأولى : انا ليه عملت المدونة ده عملتها علشان اجرب اكيد ان البني ادم بيستفيد من تجاربه ععملتها علشان اتعرف على ناس جداد
النقطة التانية : هي شكر لكل اللى ساعدونى علشان اعملها هما يمكن مش عارفين انهم ساعدوني بس انا لازم اشكرهم
وهما
عبد الله صادق الشرقاوي لما لقيته بيتكلم عن مدونة انسى , تاني حد لازم اشكره هما الناس اللى عاملين مدونة انسي
لاني لقية عندهم شرح عن ازاى اعمل مدونة صحيح ان بعضكم ممكن يقول ان الموضوع سهل ومش محتاج شرح بس ده
فعلا شجعني تالت واحد لازم اشكره هيه صاحبة (
مدونة بنت مصرية) لانها هيه اللى كاتبه الشرح ده واخيرا اشكر
ابراهيم الهضيبي ( مدونة مش هنبطل )ووائل عباس ( مدونة الوعي المصري )
ومجدي سعد (مدونة مش يلا مهم) صحيح هما معملوليش اى حاجة بس مجرد كتاباتهم واحساسي انهم 
قدروا يفيدوا البلد بمدوناتهم شجعتني