14‏/04‏/2008

انا وهؤلاء


أنا وهؤلاء

أنا ... أكيد انا محمد الأنصاري

هؤلاء... دول ناس حبتهم , أكيد مش الوحيدين اللى حبتهم ولا برده أول ناس حبتهم ولا حتى اكتر ناس حبتهم بس الناس دول من قبل لما اشوفهم كنت حبيت صفات معينه ولما قابلتهم لقيت الصفه ده باينه فيهم قوى علشان كده حبتهم من غير متعامل معاهم كتير ده يمكن متعاملتش معاهم أصلا

هذا البوكا احبه

مفتكرش انى ذاكرت علشان اتعلم غالبا كنت بذاكر علشان انجح , علشان مينفعش اسقط , علشان ارضي بابا وماما , بوكا ده مش كده ده بيذاكر علشان يتعلم صحيح انا اعلى منه في التقدير بس فعلا هوه اشطر منى في الهندسه , بوكا من الاشخاص القليلين اللى نفسي لما يخلصوا دراسه يسافروا برده لانى حاسس انهم عمرهم ما هيخدوا حقهم في البلد ده عموما بوكا مشترك السنه ده في مسابقة روبوكون ده مسابقه هندسيه لو كسب على مستوى مصر هيتاهل لمسابقه على مستوى العالم ادعوله ربنا يوفقه , بالمناسه كل لما اشوف بوكا بفتكر مثال المهندس المسلم زي ما كان الاخوه بيعلموهلنا اخلاق عباده محبوب متفوق دراسيا ...وكلام الكتب ده

د/محمود عزت

بحبه مش علشان هوه الأمين العام للأخوان واكيد برده مش علشان هوه دكتور تحاليل وعنده معمل

بحبه علشان بحس انه انسان رباني فعلا متتصوروش قد ايه بنبسط وان بشوفه بيختم الصلاه بعد الفجر

متتصوروش قد ايه بكون مبسوط وانا قاعد اتكلم معاه وحاسس بخوفه على الدعوه

متتصوروش قد ايه بكون مبسوط وانا حاسس انى بكلم واحد فاهم الدعوه صح والثوابت عنده واضحه وغير قابله للمساومه

احيانا بروح اتكلم معاه مش علشان عايز اعرف معلومه معينه لا علشان عايز احس فعلا ان الاخوان حاسين بالشباب

أروى الطويل

اخيرا عرفت انا ليه بنبسط لما شوف اروى بنبسط لانى بحبها , فعلا حبها زي لما بحب بوكا ود/محمود

من زمان وانا بحب ان ان البنت تقول رايها وتظهر - ومحدش يقولى اشمعنى البنت - ياسلام بقه لو كان رأيها ده اسلامي ويبقى تمام قوى لو كان اخواني كمان

هذه البرايد احبها

غاده عبد العال

مش عارف ايه اللى خلاني اشترى كتاب (عايزه اتجوز) هديه لأختى الى حصل اني اشتريته وبعديها حبتها

حبتها لأنها خلت اختى تقرا , حبتها لانها خلت اختى تضحك من قلبها

حبتها لانها خلتني اضحك من قلبي صحيح حطتني في شوية مواقف مش حلوه لأني كنت احيانا بقرا الكتاب في المواصلات وافضل اضحك طبعا كل اللى حوليها كانوا بيبصولى على اني مجنون بس مش مهم المهم انى ضحك من قلبي

ونصحيه اشتروا الكتاب فعلا كتاب حلو ده

وهفضل احبهم

اكيد الناس دول فيها عيوب

اكيد ان بوكا احيانا بيكون حاد في تعامله مع الناس واحيانا بيفكس

اكيد ان د/محمود احيانا مبيقنعنيش كلامه

اكيد ان أروى الطويل .... مش عارف بس اكيد فيها عيوب, كفايه اني مش عارف ادخل على مدونتها

أكيد ان غادة عبد العال مش علطول بتضحكني ده فعلا الحلقه بتاعت شبابيك معجبتنيش قوي

بس كل ده مش مهم المهم اني لقيت الصفات اللى انا بحبها في الناس دول فحبتهم ويارب تفضل فيهم الصفات ده وافضل احبهم





هناك 6 تعليقات:

Ditaur يقول...

Attention! See Please Here

JoJosho يقول...

See Please Here

يا عالم يا هوووووووووووو يقول...

اسلوبك حلو يا انصاري
ياريت تواظب على الكتابة

شهيدة يقول...

يعني مفيش غير قدام الناس غير كتاب غاده عشان تقرأه


دا البنات بيتشبهوا فما بالك بالشباب D:

هي فعلا كاتبه رائعه واسلوبها جذاب جدا .. بارك الله لها

وكل من ذكرتهم فعلا تشعر اتجاه من يقدمون شيئا ان لهم قبولا في قلوب الناس

اتم الله عليهم نعمه .. وبارك فيك

أمة الله يقول...

السلام عليكم ورحمة الله وبركاته أخي الكريم..

أرجو المولى تبارك وتعالى أن ينفع بك الإسلام والمسلمين ويعيننا وجميع شباب الإسلام على جهاد النفس لما فيه من ثواب عظيم..

أرجو من حضرتك إستبدال إنشاء الله إلى إن شاء لله لأن فرق كبير في المعنى ولنعمل سويآ من أجل توعية الجميع على هذا الأمر..

أسأل الله أن يكون القرآن جليسك و الرحمن الرحيم صديقك..لما تلاقي محدش حاسس بيك لأنه أقرب إليك من حبل الوريد...

جرب مرة يا أنصاري تجلس في غرفتك لوحدك وتشكو له وتكلمه بل وتبكي::قل له ما في داخلك! والله إنك ستشعر بإرتياح رباني ولذة لا توصف.. ستشعر كم هو قريب منك..

رزقنا الله الأخلاء ليعوننا على طاعته وحسن عبادته فلسنا هنا سوى لنعمل لنرضيه..أدعو الله أن يكونوا لك كذلك ويرزقك الصحبة الصالحة المعينة ويثبتكم جميعآ..

أرجو أن يؤخذ طلب التعديل بصدر رحب..

ختامآ:
مدونة رائعة،يقنصها فقط بعض التفاؤل،إن الله عند حسن ظن عبده به..

اللهم إرزقه أكثر من ما يتمنى..

عذرآ على الإطالة...وفقكم الله لما يحب ويرضى..

غير معرف يقول...

بارك الله فيك...
تصدق يا محمد أول مرة أشوف مدونتك أصلا على الرغم من انى عرفتك بعمق اوي فترة مش قليلة... بس مكنتش اعرف انك جواك كل ده.. اسلوبك جامد يا واد وجواك مشاعر دافئة جدا واضح انها مش بتطلع الا ادام الشاشة الكريستالية...
كنت اتمنى انك تكتب عني.. بس خيرها في غيرها ممكن تبقى تعمل موضوع عن الناس اللى كرهتهم ولا حاجة بعد كدة الاقى اسمي مكتوب .. وقولك طيب..
فعلا على رأي البنت اللى معلقة قبلى مدونتك جميلة ينقصها التفاؤل..
زعلان منك علشان مش بتكلمنى ومش بترد على موبايلي... بس كل مرة بقول اكيد انك مشغول... انا طولت عليك معلش... في أمان الله...
صديقك فترة من الزمان..مجدي